ENde wanneer als die troyanen weder inder stat van troeyen waren gecomen. ende
die poerten wel versekert ende bewaert waren ende gesloten. die gene die inden strijde vermoyt waren. die ghingen op haer ruste Ende wanneer alset weder dach ghewerden was. so ordineerde coninc priamus datmen niet strijden en soude Mer hi ontboot voer hem hector sinen soon. ende paris ende dyephebus palamydes antenor ende eneas. welcke wanneer als si voer hem ghecomen waren. soe sprac coninc priamus dese woerde tot hem luden En weet ghi niet. dat coninc thoas in onsen kercker leyt ghesloten ende gheuangen. ende welcke onverdient van ons is in sijnre coenre verwoetheit ongescent van ons gecomen om die verderfnisse van onser stat van troeyen ende van onsen volke. waer bi dattet my rechtuardich duncket wesen. dat wij hem doen liden enen quaden versmaden bitteren doot. als dat wi hem hanghen an eenre galghen. of dat wij hem sijn hooft af doen slaen. of enen anderen smadighen doot Ende dat gene dat v allen goet duncket dat suldi ons nv doen verstaen Eneas die antwoerde eerst seer oetmoedeliken ende seide aldus O lieue heer coninc dat en moet nymmermeer geschyen dat uwe hoghe clare edelheyt werde getoghen tot alsulcker onbetamelicheit ende oneeren. Want coninc thoas die is vanden besten van al
griecken. ende bouen maten machtich van vrienden ende van maghen Ende want ghi hebt veel lieuer vrienden die noch biden gryecken ouermits quader snoder auentueren wel mochten laten smaken des ghelijcen al sulcken doot. ende dan soude v dit seer berouwen Ende al hier om so isset beter heer coninc bi uwer genaden dat coninc thoas leuendich bliue v gheuanghen op dat. offer yemant vanden onsen werde geuangen dat die dan weder werden verlosset mit coninc thoas Ende hector van troyen die prijsede eneas raet. ende hi seide dat hi seer goet was. mer coninc priamus die bleef noch bi sinen opsette ende hi seide aldus Is dat sake dat dit v allen goet duncket wesen so sullen die grieken segghen ende vermoeden dat wi veruaert sijn ende dat wi niet alsoe coen en sijn ende wi recht ende wrake dorren doen ouer onse vianden Ende wanneer als desen raet aldus was ghecomen ten eynde so seide eneas dat hi woude gaen tot helena. ende leyde mit hem troeylus ende anthenor Ende wanneer als si te samen ghinghen in eenre salen van wonderlijcker groter schoenheyt ende costelicheyt In welker salen doe te samen saten. hettuba ende helena mit veel frisscher edelre vrouwen ende ioncvrouwen in goeden gheselscappe Troeylus ende eneas die troestede die conincinne. mit goeden soeten sachten woerden Ende hettuba als een vroede ende onderscheiden wijse vrouwe die vermaende si doe mede mit goeden bequamen oetmoedighen woerden om die behoedinghe ende bescerminghe der goeder stat van troeyen ende haers volcs. ende binnen deser tijt soe beclagheden die gryeken den doot ende dat grote verlies hare vrienden ende si seyden dat si bouen maten dwaes ende sot waren. dat si hem lieten brenghen tot alsulcken groten verlies ende scade. welcke dat si wel mit eeren salichlijcken mochten hebben ghelaten
¶ Dits vanden vijften dootliken stride
IN deser seluer nacht werter grote duusternisse ende daer viel also veel waters. als
oft nye en hadde ghereghent in voerleden tiden Ende recht als of die goden wouden vander misdaet der menschen wrake hebben ghedaen Ende noch dattet alre swaerste was daer was also groten storme ende wint. dat alle die tenten der gryecken. die waeyden vter aerden. waer bi dat die gryecken doe leden grote scade ende groten anxt ende vrese mer doe die nacht gheleden was. ende die dach aencomende was so ghingen die gryeken weder in haren wapenen ende
si quamen weder te strijde Ende vanden griecken. soe was doe achilles die eerste inden velde met sijnre scaren Ende daer na coninc agamenon Dyomedes Coninc menelaus. ende menestenus die hertoghe van athenen Ende achilles die bestreet doe ten eersten male den groten coninc tarissa die daer genoemt was vpon welcke vpon alsoe groot was als een ruese dien achilles doot stack met sijnre glauyen dat hi neder viel van sinen paerde aldoot opter aerden Ende coninc stelenus die bestreet hector dien hector doe haesteliken bestreet weder ende versloegh ter doot Dyomedes die slooch doot coninc santyphus die teghen hem street Doe quamen daer twe coninghen. daer die een af was genoemt epistrophus. ende die ander thedius. ende die bestreden doe hector van troeyen met ghesamender hant Mer want coninc epistrophus hector wel bekende eer hi hem bestreet. soe versprac hi hector seer leliken ende qualiken met veel confuyseliken woerden Ende daer na stack hi op hector met sijnre glauien. mer hector die bleef seer vaste sitten in sinen sadel op sijn paert Waer bi dat hector van sinen steeke. ende van sinen woerden seer toernich wert. ende hi slooch coninc epistrophus seer wredeliken dat hij daer doot bleef Ende hector die seide ganc nv ende spreke dine confuselijke woerde onder den doden die du rechtevoert sprakeste onder den leuendigen Ende wanneer als coninc thedeus sach dat coninc epistrophus sijn broeder doot was. so wert hi bouen maten seer bedroeft ende hi riep tot hem dusent ridderen dat si hem helpen souden hector verslaen ende wreken sijns broeders doot. welcke doe te samen bereet waren. ende si bestreden hector. ende si worpen hem van sinen paerde Ende wanneer als coninc thedeus sach dat hector was van sinen paerde. soe hief hi op sijn swaert. ende hi woude hector verslaen Ende hector die voersach den slach. ende hi slooch met sinen swaerde coninc thedeus af sinen armen tot sinen scouderen toe. ende hij viel van sinen paerde. ende hector die trat tot hem. ende hi slooch hem te vollen doot Ende eneas die sloech doot coninc amphymacus Coninc menelaus Menestenus die hertoghe van athenen Coninc thelamon Ende coninc vlixes met al haeren scaren die quamen doe inden strijt Ende aldaer wert doe een groot sware nydich strijt an beiden siden. ende dat was omtrent den middaghe Mer doe vergaderden die griecken in also groter menichuoudicheyt dat
die troyanen doe wijcken moesten ende doe versloech achilles coninc pilixis waer om dat hector seer toernich wert ende hi versloech doe twee die ouerste princen ende vorsten van gryecken als coninc carperon ende graue darius Ende doe begrepen die troyanen weder dat velt in groter ouermoedicheyt mer doe vter stat van troeyen die homoedighe coninc epistropus quam mit drie dusent vromer ridderen die welcke dat den griecken doe deden groten laste ende swaere pine ende verdriet ende sonderlinghe enen abelen fellen scutte. die hi doe bi hem hadde ende dese schyeter of scutte die was van sinen nauel opwaert een mensche. ende van sinen nauel nederwaert so was hi een paert ende bouen ende beneden. was hi al vast bedecket mit eenre paerts huyt ende mit paerts haer. ende al haddet een aensicht als een mensche. het was nochtan root als een vuer ende sijn oghen die barnden als een vuer ende het riep ende neyede als een paert. waer of dat die gryeken seer veruaert waren Ende dese scut die en was niet gewapent mer hi hadde enen starcken stiuen boghe in sinen handen. ende een koker mit pilen al vol scuts ende dese die quam mede mitten coninc te stride. waer of dat die paerden seer veruaert werden ende si sprongen achterwaert ende werden vluchtich want die scutte stadeliken scoot Ende alhier binnen sloech hector doot den hertoghe van salmania Ende want dese schieter aldus wredeliken ende vreselicken schoet op den gryeken ende die troeyanen die gryeken seer vromelicken ende manliken bestreden soe werden die gryeken vluchtich tot haren tenten Ende doe ghesciede daer noch een wonderlike auentuere. want wanneer als die gryecken werden voeruluchtich tot haren tenten. ende oec mede dyomedes so veruolgede die scutter dyomedes alsoe crachtelijcken. dat dyomedes hem seluen moeste verweren. want hi hem seluen doe nergent en mochte bescutten. ende hi was seer swaerliken van dien schieten ghewont Ende alhier om so keerde hem dyomedes wederomme. ende hi bestreet desen veruaerliken schieter. ende sloech hem doot want hi was onghewapent waer om dat die gryecken dat velt doe weder begrepen. ende si dwonghen die troeyanen dat si weder moesten wijcken Ende hector die reet doe op achilles. ende achilles die reet weder op hector. ende si worpen malcander weder van haren paerden. mer achilles die was eerst op sijn paert. ende hi greep hectors paert datter ghenoemt was galathea. ende hi woudet hem roeuen ende
benemen Mer hector die wert seer toernich ende verwoet in hem seluen. ende hi riep tot sinen volcke dat si hem sijn paert niet en souden laten nemen noch rouen Ende doe quamen hem veel ridders te hul pen ende te baten. ende sij ontnamen achilles weder hectors paert. ende si gauent hector weder. ende doe was hector seer blide ende wel te vreden Ende als anthenor an een ander side street so wert hi geuanghen vanden griecken. ende si seynden hem totten tenten der griecken Ende al was dat sake dat polydamas anthenors sone was. ende dat hi doe grote dingen met gewelt dede om anthenor sinen vader te verlossen. nochtan want die dach ten eynde quam. ende om dattet duyster wert so is die strijt ten eynde ghecomen