Hierdie God onderrig ons tydens gebed

Wanneer ons bid vra ons vir God om ons te onderrig in Sy wet en in die nakoming van dit wat Hy vir ons lewens wil hê, sodat ons daardeur gelei mag word tot dieper geloof en selfs ʼn nuut- making van ons geloof. Gebed beteken dat ons onsself voor God bring, en ons leë arms na Hom toe uitstrek met die hoop dat ons sal ontvang van Hom wat reeds Homself aan ons gebring het deur die Woord. God alleen kan ons help in tye van nood, en die manier waarop ons Hom vra om ons te help is deur gebed (Barth 2002:11).

3.3.3 Die vrymoedigheid van die mens om God te mag vra

Gebed is vir Barth ʼn handeling van vryheid voor God, en behalwe hiervoor is gebed ook nodig, omdat ons swak is en hulp nodig het bo onsself en seën nodig het wat net deur God aan ons voorsien kan word. Omdat God die een is wat alles van ons af weet en die enigste een is wat kan voorsien in ons diepste nood, sal enige poging van ons kant af om Sy wil te probeer beïnvloed onvanpas wees. Ons bid dus omdat ons na God se wil smag en die vryheid wat daardeur gevind word (Migliore 2002:96-97).

Migliore wys vir ons verder Barth se verstaan van die vrymoedigheid van die “mag vra” van die gebed wat ook as ʼn petisie beskryf kan word. Hierdeur onderstreep Barth dat ons met leë hande na God toe kom wanneer ons bid, met ʼn vryheid om God te nader en te weet dat Hy na ons luister. Die mens se reaksie op God wat ons in staat stel om te bid is bloot om Hom aan te roep in alle omstandighede, goed of sleg. Dit is hierin wat ons hoop vind wanneer ons bid, dat ons God kan aanroep op enige stadium en dat Hy reeds reageer het deur Christus se verlossing en op ons aanroeping voordat ons Hom nader in gebed (Migliore 2002:98-99).

43

In gebed is ons verbondsvenote in die werk van God, omdat ons daardeur op ʼn spesifieke manier leef, glo en Sy Woord verkondig. Ons gebed is die “ja” op God se oproep om saam met Hom te leef in hierdie wêreld, sodat wanneer ons praat Hy sal luister en antwoord. Ons word dus deur gebed uitgenooi deur God om deel te neem aan Sy werke en daardeur deel te wees van Sy gemeenskap (Barth 2002:20-21).

Ons sien God se werke in die skepping deur gebed en Sy handeling word daarin aan ons bekend gemaak. Wanneer ons in gebed tree weet ons reeds iets van wie God is, Sy karakter. Ons kom na Hom toe sodat Sy werking – wat reeds plaasvind – sy volheid kan bereik in ons lewens. Omdat God se naam reeds heilig is wanneer ons in gebed tree, het ons rede om te bid en te volhard in hierdie hoop wat Hy bring (Barth 2002:32-33). Ons bid omdat ons weet dat God na ons luister; omdat ons weet dat Hy aan ons geluk bring; en omdat ons aan elkeen wat nie glo nie, die ware geloof wil bekend maak en wil wys dat God betrokke is in ons lewens (Barth 2002:34).

Wanneer Jesus Christus bid, dan bid Hy vir die hele mensdom en wanneer ons dan saam met Hom bid, dan bid ons ook saam met Hom vir die hele mensdom. Ons word uitgenooi en geroep om te bid en het daarom die vryheid om na Christus toe te kom (Barth 2002:23).

In Christus het God ons doel met Sy doel verenig en daardeur vra God vir ons om Hom te vertrou met al ons “bagasie”. Sonder God sou daar nie ʼn mensdom kon wees nie, en daarom beveel hy ons om te bid sodat ons dit mag weet en beleef. Dit is egter belangrik om te weet dat alhoewel ons primêr geskape is vir God en om Sy naam te verheerlik, kan ons ook ons eie sake na God toe bring sonder dat dit afwyk van God se doel (Barth 2002:28-29).

In gebed bring God vir ons die vryheid wat hy vir ons verwerf het. Ware vryheid is om te bid tot die God wat aan ons vryheid kom bied het en in ons gebed vra ons dat die Heilige Gees ons sal lei om in hierdie vryheid te lewe. Hiermee saam bewys ons ons dank aan God deurdat ons juis bid ten spyte daarvan dat ons weet dat Hy reeds ons petisies gehoor en beantwoord het.

Ware geloof is om te bid sê Van Zyl (2013:4) en ek kan nie anders as om met hom saam te stem nie. Wanneer ons bid dan aanvaar ons ons afhanklikheid van God. Dan glo ons in meer as net ons lewe hier op aarde, want ons glo in verandering bo dit wat ons op aarde beleef en

44

hierdie verandering kan slegs kom van iets buite die skepping. Iets wat reeds binne ons realiteit bestaan, kan nie “nuut maak” nie, want dit is reeds deel van dit wat bestaan. Dit moet dus iets buite ons realiteit wees wat die verandering teweeg moet bring. Dit is geloof in God vir dit wat Hy reeds gedoen het en steeds doen met die wete dat Hy verandering gebring het en steeds kan bring. Daarom kan ons steeds vandag met vrymoedigheid bid en weet dat God luister en dat Hy verandering kan bring in ons huidige bestaan.

3.4 Om saam te vat

Om te vra in gebed is vir Barth iets meer as net ʼn blote uitroep. Dit is ʼn smag na God se teenwoordigheid in ons lewens omdat Hy die Vader is wat voorsien, wat in ʼn verhouding met ons wil staan sodat ons daardeur getransformeer mag word. In hoofstuk 3 is daar gewys dat gebed vir Barth drie primêre kenmerke behels, naamlik om te mag vra, om vir God te mag vra en die vrymoedigheid om vir God te mag vra. Dit behels ʼn diepe vertroue en sekerheid in wie God as Vader, Seun en Heilige Gees is.

Gebed is dus vir Barth ʼn soeke na God se ingrype en ʼn hoop dat Hy nuut sal maak daar waar ongeregtigheid en swaarkry aan die orde van die dag is. Dit is ʼn soeke na ʼn transformasie wat slegs deur God teweeg gebring kan word, wat die werklikheid van hierdie lewe nie betree nie, maar te bowe gaan.

In hoofstuk 4 gaan die transformatiewe aard van gebed meer in diepte bespreek word aan die hand van die werklikheid van God se koninkryk nie net in die toekoms nie, maar reeds vandag deurdat Hy met ons handel en Sy wil aan ons bekend maak sodat Sy wil ook ons wil mag word en ons Hom mag aanspreek as ons Vader.

45

Hoofstuk 4: BARTH EN DIE TRANSFORMATIEWE AARD VAN