Eienskappe en aksies van outonoom-gemotiveerde Grondslagfase-

presies watter vaardighede en kennis die leerders teen die einde van die skooljaar moet kan bemeester. Geen boustene of konsepte word deur hierdie onderwysers weggelaat wat deur die leerders bemeester moes word nie (Dedmond, 2009). Die assesseringstake wat aan die leerders verskaf word, word dan ook volgens Bloom se taksonomie opgestel (Dailey, 2009). Die gemotiveerde Grondslagfase-onderwysers maak dus seker dat die leerders vrae nie net op die vlak van laeorde-denke kan beantwoord nie, maar ook deur gebruik te maak van hoë-ordedenke. Outonoomgemotiveerde Grondslagfase-onderwysers is op hoogte van die nuutste tegnologie en implementeer dit ook in die klaskamer wanneer lesse aangebied word. Die gebruik van tegnologie het goeie akademiese prestasie van leerders tot gevolg omdat leerders meer geïnteresseerd is in lesse wat met die gebruik van tegnologie aangebied word. Op hierdie manier onthou die leerders die inhoud ook beter (Andersen, 2011).

Toekenningstelsels is ʼn belangrike sisteem wat deur outonoom-gemotiveerde Grondslagfase- onderwysers in hulle klaskamers geïmplementeer word (Williams & Williams, 2012). Wanneer leerders byvoorbeeld volpunte vir ʼn speltoets kry, ontvang hulle ʼn roomys. Hierdie tipe stelsels motiveer leerders om op akademiese gebied te presteer. Die outonoom-gemotiveerde onderwyser erken prestasies van alle leerders in die klaskamer, al is dit net om die leerder wat die beste vordering getoon het, te beloon (Williams & Williams, 2012).

Outonoom-gemotiveerde Grondslagfase-onderwysers skep ʼn atmosfeer van liefde en omgee in die klaskamer, waar foute begaan mag word. Sodra die leerders die Grondslagfase-onderwyser vertrou, en van haar hou, is die leerders ook meer gemotiveerd om skooltoe te wil kom en te kom leer, wat akademiese prestasie tot gevolg het. Leerders presteer dus beter in ʼn omgewing waarbinne hulle veilig en liefgehê voel (Williams & Williams, 2012).

Self-refleksie word dikwels deur outonoom-gemotiveerde Grondslagfase-onderwysers beoefen (Heitzmann, 2010). Self-refleksie het akademiese prestasie van leerders tot gevolg omdat die onderwyser dikwels haar onderrigmetodes aanpas by die omstandighede van die klas wat voor haar sit. Tydens self-refleksie bekom die onderwyser ook waardevolle inligting rakende watter van sy/haar praktyke doeltreffend werk vir leerders om te kan presteer en watter nie. Self- refleksie laat die onderwyser ook toe om introspeksie te doen en sy/haar swakpunte en sterkpunte te kan identifiseer. Met die identifisering van swakpunte kan raad gevra word deur die Outonoom- gemotiveerde Grondslagfase-onderwyser van sy/haar departementshoof of kollegas. Op hierdie manier werk die onderwyser aan haar swakpunte en verbeter dit ook die onderrig van leerders. Op die manier word terugvoer op ʼn gereelde basis aan leerders gegee. Hierdie terugvoer wat

aan leerders gegee word, help die leerders om te presteer omdat die leerders voortdurend weet waar hulle foute begaan het, en hoe om hierdie foute te korrigeer sodat dieselfde foute nie weer begaan word nie (Rugutt & Chemosit, 2009).

Grondslagfase-leerders leer doeltreffend deur aktief betrokke te wees by die lesse en bewegings uit te voer (Manzo, 2010). Die outonoom-gemotiveerde Grondslagfase-onderwysers maak altyd seker dat die leerders aktief betrokke is tydens die aanbieding van lesse deur aksies uit te voer, te dramatiseer of te sing en dans. Die aktiewe betrokkenheid van leerders tydens lesse lei tot die akademiese prestasie van leerders omdat leerders makliker konsepte wat aktief uitgevoer is in die brein kan herroep. Hierdie aktiewe betrokkenheid sluit ook aan by die volgende stelling: “If you tell me I will listen. If you show me I will see. If you let me experience, I will learn.” Lao-Tzu

Storievertelling en lees hou groot waarde in die Grondslagfase-klaskamer (Manzo, 2010). Storievertelling kan die pas van die leerders verander, ʼn varsheid bied om leerders te laat deelneem aan die lesaanbieding, leerders motiveer rakende dissipline, die leerders verstandelike ruimte bied om hul eie betekenisse te konstrueer, analogieë te verskaf tussen ʼn storie en dissipline. Stories help leerders ook om die wêreld te verstaan, kan nadenke genereer, en gemeenskaplike betekenisse ontwikkel. Wanneer stories vertel word, neem leerders eienaarskap van hul eie leer en word deel van die leerproses. Stories kan dus gebruik word om leerders enige vorm van dissipline aan te leer (Manzo, 2010). Outonoom-gemotiveerde Grondslagfase- onderwysers maak dus van baie storievertellings gebruik tydens die aanbieding van lesse. Hierdie storievertellings word dan ook gebruik om sekere kennis en vaardighede aan leerders oor te dra, wat dan bydra tot akademiese prestasie omdat die leerders oor meer sin van die wêreld gekonstrueer het.

Verder tree outonoom-gemotiveerde onderwysers ook dikwels in verbinding met leerders se ouers en dit het akademiese prestasie van leerders tot gevolg, in die sin dat ouers deurgaans bewus is van die stand van hul leerder se akademie. Ouers raak meer bewus van waarmee hul leerders sukkel, en verleen dan die nodige bykomstige hulp tuis aan die leerders (Fulton & Turner 2008). Individuele aandag van die ouers aan die leerders is van kardinale belang (Fulton & Turner 2008).

Die outonoom-gemotiveerde Grondslagfase-onderwysers sal aan die begin van die skooljaar ʼn basislyn-assessering met al die leerders doen om die akademiese vlak van die leerders te bepaal (Manzo, 2010). Die Grondslagfase-onderwyser sal na afloop van hierdie assessering weet wie die sterker leerders in die klaskamer is, en wie die swakker leerders is (Friedman & Maher, 2010)

Die outonoom-gemotiveerde Grondslagfase-onderwyser ontwikkel dan verrykende aktiwiteite vir die sterker leerders, en minder uitdagende aktiwiteite vir die swakker leerders. Op hierdie manier kan beide die swakker leerder en die sterker leerder met geleenthede toegerus word om sukses te behaal en raak die swakker leerder nie voortdurend gedemotiveer weens al die uitdagende take wat van hom verwag word nie. Akademiese prestasie kan dan sodoende ook deur die swakker leerders ervaar word en nie net deur die sterk leerders nie.

Na aanleiding van die voorafgaande paragrawe is dit duidelik dat ʼn direkte verband bestaan tussen die gemotiveerdheid van Grondslagfase-onderwysers en die akademiese prestasie van leerders. Die intrinsiek-gemotiveerdheid van Grondslagfase-onderwysers lei dus daartoe dat die onderwysers die ekstra myl loop wanneer dit by die onderrig van leerders kom. Hierdie ekstra myl wat deur die intrinsiek-gemotiveerde Grondslagfase-onderwysers vir die leerders geloop word, lei dus tot die volhoubare akademiese verbetering van die Grondslagfase-leerders.