synen naem aen der roede hangende synde. Hyer wt blickt openbaerlick dattet wynter
waes doe dyt geschiedde, al en wist mens anders wt genen scryfturen. Ende aldan
quam oec Joseph inden tempel mitten jongelingen ende bracht syne roede ende sy
gyngen al in processie totten altaer, die ioncste voer. Ende alsdan die biscop hoere
alre roeden had, doe vragde hi raet aen god, ende hem waert geantwoort: doet al die
roeden in sancta sanctorum; daer sullen sy desen dach ende nacht bliven, ende segt
hen allen, dat sy morgen vroe weder comen, ende eyn yegelic sal syne roede halen
van dynre hant. Ende wes roede dan bloeyende weert ende eyn witte duve van den
hemel daerop comt, dien sal men die ioncfer maria ter echt geven. Des anderen dachs
alst volck vergadert was ende die biscop aen den altaer staende synde, ende eyn
iegelic syn roede nam van synre hant, doe en vernam men dat teicken op nemens
roede. Doe dede die biscop Abyachar alsulcke cleyder aen, als daertoe behoerden
ende ginck in dat sancta sanctorum ende dede sacrificie ende offerhande ende
bedinghe. Doe quam die engel michael tot hem en seide: Sie hier dese korte roede,
daer du niet op en myctes, dese en leidestu mitten roeden niet. Alstuse geefs den
alsten den sy toehoert, soe sal dy comen dat tecken, dat ic dy seide. Ende also die
heilige wtvercoren vrunt gods ioseph was achterstaende, xxxiij. iaer alt wesende
ende drie maent, (nae onsen iaeren toerekenen, die van xii maenden syn, mer naeden
alden iaeren die van x maenden plagen te syn soe was hi xl. jaer alt), sich onwerdich
daertoe kennende. Ende oec was syn voernemen ende opsat in syn mechdelicke
reynicheit te bliven, daerom liet hi
ongemerckt syn roede te haelen. Doe reepem die biscop ende seide: coemt tot my
eerwerdige ioseph ende hael dyn roede. Ende doe hi ten altaer quam, daer die reyne
ioncfer maria tegenwordich stont, ende syne hant voert stack ende na die roede, te
hants is sy bloeyende geworden ende bracht rechte voert drie riepe amandelen, ende
boven wtter roeden soe vloech eyn duve witter dan die snee, die alte schoen was,
ende sy vloech eyn wyle alom inden tempel ende clom doe op ten hemel, twelck die
biscop ende al dat volck syende waren. Ende sy laefden ende danckten god hoechlic,
mit love, mit sange, mit salteren, mit orgelen ende mit alreleide suet geluyt van speel.
Ende dyt aldus geschiet synde, soe heeft ioseph maria terstont getrowt mit groter
eere, in tegenwordicheyt des biscops ende al des volcks ende sancta anna haere
moeder, opten xv. dach der maent januarius. Ende al dat volck van Ysrahel seide
totten werdigen wtvercornen ioseph: du bist die salichste in al dynen geslecht, want
god set dy alleen voer al die kynder van Ysrahel te hebben die edel ioncfer maria. O
grote werdicheit iosephs, die eyn ander aaron geworden is, wies roede bloeyende
waert, doe hi in eynen priester vercoren waert, soe als in dat boec nummeri staet
inden xvij. capitel. Alsdan die ioncfer maria getrowt was, soe heeft sy noctans
volcomen betrowen in god gehouden, dat hi hoer reynheit wael behalden solde. Ende
ioseph des gelicks in hem selven opgenomen hebbende eyn reyn leven te leiden, soe
heeft elck, by ingeven des heiligen geests, vanden anderen verstaen synen opsat.
Ende hebben elck den anderen hiervan synen wil te kennen gegeven ende by gelicken
raede beyde reincheyt beloeft. Nochtans is tussen joseph ende maria een volcomen
huwelic gesloeten geweest, want consent dat is die substancie van huywelic ende
die woerden dat is die form, te weten dat
seggen: ic geve u myn trou, of in deser gelicker woerden. Alsdan dit al geschiet was,
soe toch joseph te bethleem tot synen huyse om te bestellen die dingen, die totter
bruyloft behoerden, want daer waren van moyses toegesat lxxij daghen, daer die
bruydigom dit in plach te doen. Dan en plach die bruyt wt haren huyse niet te gaen
die gesette dagen en waren om. Mer die biscop had marien heiten gaen tot hoeren
alderen huyse, of tot eyn van hoeren naesten vrynden, ende daer bliven den tyt van
dagen, die moyses geset had. Ende die biscop sande maria mit hoere moeder en
hoeren gesynne mit groter eere te nazereth in ioachyms hoers vaders huys, dat hoer
alleen aengeerft was. Ende hi gaf haer mit vyf ionckferkens tot hoeren solaes ende
werdicheit. Alsdan maria, die gebenedyde ioncfer, te nazareth eyn corten tyt geweest
had, doe geboertet eyns, dat sy nae hoeren gewoenten alleyn was in bedinge in hoer
slaepcamer op eynen vrydach des avens, te weten opten lxix. dach nadat sy ioseph
getrouwt was, opten xxv. dach van meert, die maen alt wesende xv. dagen, in die
derde indictie. Soe is sy van den engel gabriel gegruet ende den soen gods ontfangen
gelick lucas die ewangelist dat beschryft in syn j. capittel. Doe is maria des morgens
mit oerlof van hoere moeder vertogen int gebercht tot Elisabeth hoere nichte, om
hoer geluck te beden, want die engel had oer gesecht: et weer mit hoer die vj. maent.
Int leist dan van den gesetten dagen, daer ic voer van gesacht heb, soe is joseph wt
Judeen in Galileen eerlic comen in die stadt nazereth, om syn bruyloft te halden ende
marien tot synen huyse te leiden. Ende doe hyse daer niet en vant ende hem sancta
anna seide, dat sy mit hoeren orlof int gebercht gereist waer tot hoeren nichte
elysabeth, doe hi dat hoerde, soe is hi oec naden geberchte gangen ende quam in
zacharias syns neven huys
ende elysabeth die oec syn nicht was. Ende hi seide marien synre bruyt, die opten
staende voet daer ierst coemen was, dat alle dingen bereit waren die totter bruyloft
hoerden. Doe bad die eersamige vrou elyzabeth joseph, hoeren neve, dat hi syn
bruyloft daer halden wolde ende hoen magen ende vrunden van beyden syden daer
vergaderen. Datwelk aldan geschiet is mit groter stoet en eere, want joseph ende
maria waren van groten rycken edelen luyden van der conincklicken crone here
davids. Alsdan die eerlicke feest der bruyloft gehalden was ende die vrunden ende
magen vandaer vertogen waren, ende doe toch ioseph weder te Bethleem tot synen
huyse ende was daer twe maent, want het was ierst mit Elysabethen die vij maent,
want sy hat hoer kynt ontfangen opten xxiiij dach van September. Alsdan die werdige
vrouwe elisabeth hoeres kynts bevallen was, hetwelk gebeurde in die derde indictie
op eynen vrydach, des xxiiij. dachs in junio, doe is ioseph weder comen int gebercht,
om maria tot synen huyse te leiden, die hi soe lange doer bede wil synre nichten
elisabeth bi hoer gelaten had; doe sach hi dat sy swaer inden licham was, doe waert
hi seer bedroeft. Mer hi en woldse niet beschemen ende oec niet tot synen huyse
leiden, mer heimelic by der moeder laten bliven ende vandan ruymen wt den landen.
Doe heft die engel hem geopenbaert ende toegesproken in sinen slaep, ende seide:
Joseph davids soen ende ontsich dy niet te nemen maria dyn getroude, want dat in
haer ontfangen is dats van den heiligen geest, so als dat matheus die evangelist bryder
bescryft in syn j. cap. Doe hi dit gehoert had van den engel, waert hy seer verblyt
ende nam maria syn bruyt ende leidense mit hem te nazereth tot synen huyse, ende
was hoer besorger ende bewaerer ende hoers lieven soens
ihesus al syn leven lanck. Laet ons dan lieve broeders desen werdigen dach der trouwe
marias der moeder gods hoechtylick ende devotelic celebrieren. Aenmerckt toch, o
devote herten! die grote teiken ende myrakelen die hierdoer geschiet syn, die werdich
syn der iaerlicker gedinckenisse marien der moeder gods. Ende of ement twifelde
die trouwe van marien geschiet te syn op desen voerscreven dach, die ondersueck
vlitelic dat alde ende dat nye testament ende al die scryftueren doer, ende hi anders
gefynden of is hem anders van god vertoent, die bid ic dat syt verclaeren mit bewys
ende orkonschap der schryftueren. Mer die hem des niet en verstaen die sullen desen
materie laten bliven als sy se vynden. Meister Johan Gerson doctor ende canselier
van parys die scryft, dat synte ioseph gestorven is opten xix. dach van meert ende
dat syn hochtyt oec gecelebreert wert opten xv. dach van januario, dats hoe hi marien
trouwde inden tempel. Nu bid ic allen liefhebberen maria der moeder gods, dat sy
over mynen arbeit voer my bidden, opdat wy al te samen comen moegen totter
hemelscher bruyloften, dat ons verleenen moet die vader, die soen ende die heylige
geest. Amen.
Kronijk uit het Klooster Maria-Wijngaard te
In document
Publications de la Société Historique et Archéologique dans le duché de Limbourg. Deel 12 · dbnl
(pagina 139-144)